वालवडच्या सुपुत्राची महाराष्ट्र पोलिस सेवेत झेप; धनंजय सावंतांकडून सत्कार
भूम : वालवड गावचे सुपुत्र दीपक दत्तात्रय विभुते यांची महाराष्ट्र पोलिस सेवेत निवड झाल्याबद्दल त्यांचा विशेष सत्कार करण्यात आला. माजी जिल्हा परिषद उपाध्यक्ष तथा विद्यमान जिल्हा परिषद सदस्य यांनी दीपक विभुते यांचा शाल, पुष्पगुच्छ देऊन गौरव केला व पुढील वाटचालीस शुभेच्छा दिल्या.
यावेळी बोलताना धनंजय सावंत यांनी सांगितले की, ग्रामीण भागातील युवकांनी जिद्द, चिकाटी आणि कठोर परिश्रमाच्या बळावर यश संपादन करून समाजासमोर आदर्श निर्माण केला आहे. दीपक विभुते यांची महाराष्ट्र पोलिस सेवेत झालेली निवड ही वालवडसह संपूर्ण परिसरासाठी अभिमानाची बाब असून त्यांच्या यशामुळे इतर युवकांनाही प्रेरणा मिळणार आहे.
दीपक विभुते यांनीही आपल्या यशाचे श्रेय आई-वडील, गुरुजन आणि कुटुंबीयांच्या पाठिंब्यासह सातत्यपूर्ण मेहनतीला दिले. स्पर्धा परीक्षांची तयारी करणाऱ्या युवकांनी आत्मविश्वास आणि संयम राखून ध्येयाकडे वाटचाल करावी, असा संदेश त्यांनी यावेळी दिला.
दीपक विभुते यांच्या यशाबद्दल ग्रामस्थ, नातेवाईक, मित्रपरिवार तसेच विविध क्षेत्रातील मान्यवरांकडून त्यांच्यावर अभिनंदनाचा वर्षाव होत असून वालवड गावाच्या शिरपेचात मानाचा तुरा रोवला गेल्याची भावना व्यक्त केली जात आहे.
Total views : 12297