बसस्थानकातील दुचाकी चोरट्यांना बेड्या; स्थानिक गुन्हे शाखेची धडक कारवाई, चार मोटरसायकली जप्त

धाराशिव, प्रतिनिधी : धाराशिव शहरातील बसस्थानक परिसरातून दुचाकी चोरी करणाऱ्या दोन सराईत चोरट्यांना स्थानिक गुन्हे शाखेने अटक करून त्यांच्या ताब्यातून चार चोरीच्या मोटरसायकली जप्त केल्या आहेत. या कारवाईमुळे शहरातील वाहनचोरीच्या घटनांच्या तपासाला गती मिळाली असून पोलिसांच्या तत्परतेचे कौतुक होत आहे.

स्थानिक गुन्हे शाखेचे पथक २२ मे रोजी मालमत्तेविषयक गुन्ह्यांतील आरोपींची माहिती घेत धाराशिव शहर पोलीस ठाण्याच्या हद्दीत गस्त घालत होते. त्यावेळी गोपनीय बातमीदारांकडून तसेच तांत्रिक विश्लेषणाद्वारे दोन संशयित इसम अंबालना हॉटेलसमोरील चौकात चोरीच्या मोटरसायकलसह थांबले असल्याची माहिती मिळाली.

मिळालेल्या माहितीच्या आधारे पोलिसांनी सायंकाळी सुमारे पाच वाजता सापळा रचून दोघांना ताब्यात घेतले. चौकशीदरम्यान त्यांनी आपली नावे राजेश उर्फ राजा परमेश्वर बनसोडे (वय २१, रा. साठे नगर, धाराशिव) आणि अतिष हनुमंत सगर (वय २२, मूळ रा. सांगोला चौक झोपडपट्टी, पंढरपूर, जि. सोलापूर, सध्या रा. गावसूद, धाराशिव) अशी सांगितली.

पुढील चौकशीत दोघांनीही मोटरसायकल चोरी केल्याची कबुली दिली. त्यानंतर पोलिसांनी त्यांच्या ताब्यातून अंदाजे ६० हजार रुपये किंमतीच्या चार चोरीच्या मोटरसायकली जप्त केल्या. जप्त वाहनांसह आरोपींना पुढील कायदेशीर कारवाईसाठी आनंदनगर पोलीस ठाण्याच्या ताब्यात देण्यात आले आहे.

ही कारवाई पोलीस अधीक्षक रितु खोखर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार यांच्या आदेशानुसार सहाय्यक पोलीस निरीक्षक अमोल मोरे, पोलीस हेडकॉन्स्टेबल बळीराम शिंदे, अमोल चव्हाण, राहुल नाईकवाडी, चालक पोलीस अंमलदार दहीहंडे तसेच पोलीस अंमलदार बिराजदार यांच्या पथकाने यशस्वीरीत्या पार पाडली.

स्थानिक गुन्हे शाखेच्या या कारवाईमुळे वाहनचोरांमध्ये खळबळ उडाली असून, नागरिकांमध्ये सुरक्षिततेची भावना अधिक बळकट झाली आहे.