वडार समाजाच्या प्रश्नांवर मंत्रालयात निर्णायक बैठकमुख्यमंत्री फडणवीस यांच्या सूचनेनुसार आढावा; समाजाच्या मागण्यांवर तातडीच्या कार्यवाहीचे निर्देश

वडार समाजाच्या प्रश्नांवर मंत्रालयात निर्णायक बैठक
मुख्यमंत्री फडणवीस यांच्या सूचनेनुसार आढावा; समाजाच्या मागण्यांवर तातडीच्या कार्यवाहीचे निर्देश
मुंबई, प्रतिनिधी : वडार समाजाच्या प्रलंबित प्रश्नांच्या सोडवणुकीसाठी मंत्रालयात महत्त्वपूर्ण आढावा बैठक संपन्न झाली. लातूर येथे पार पडलेल्या वडार समाजाच्या राज्यस्तरीय मेळाव्यात समाजबांधवांनी मांडलेल्या विविध मागण्या आणि समस्यांची गंभीर दखल घेत मुख्यमंत्री देवेंद्र फडणवीस यांच्या सूचनेनुसार इतर मागास बहुजन कल्याण मंत्री अतुल सावे यांच्या अध्यक्षतेखाली ही बैठक आयोजित करण्यात आली.
बैठकीत वडार समाजाच्या सामाजिक, शैक्षणिक आणि आर्थिक उन्नतीसंदर्भातील विविध प्रश्नांवर सविस्तर चर्चा करण्यात आली. तांडा वस्तीच्या धर्तीवर ‘वडार वस्ती सुधार योजना’ सुरू करणे, समाजबांधवांना जातीचे तसेच इतर आवश्यक शासकीय प्रमाणपत्रे सुलभतेने उपलब्ध करून देणे, वडार समाजातील नागरिकांची कामगार म्हणून नोंदणी करणे, उद्योग-व्यवसायासाठी विनातारण बीज भांडवली कर्ज उपलब्ध करून देणे यासह विविध महत्त्वाच्या मागण्यांवर सकारात्मक चर्चा झाली.
समाजाच्या न्याय्य मागण्यांवर तातडीने कार्यवाही करून प्रश्न मार्गी लावण्याबाबत मंत्री अतुल सावे यांनी संबंधित विभागांना स्पष्ट निर्देश दिले. शासन वडार समाजाच्या सर्वांगीण विकासासाठी कटिबद्ध असून सामाजिक न्याय आणि विकासाच्या प्रक्रियेत समाजाला मुख्य प्रवाहात आणण्यासाठी आवश्यक त्या उपाययोजना राबविण्यात येतील, अशी ग्वाही यावेळी देण्यात आली.
वडार समाजाच्या विकासासाठी सुरू असलेला हा पाठपुरावा निश्चितच समाजबांधवांच्या अपेक्षा पूर्ण करण्याच्या दिशेने महत्त्वाचे पाऊल ठरणार असल्याची भावना उपस्थितांनी व्यक्त केली.
यावेळी संचालक सोनाली मुळे, इतर मागास बहुजन कल्याण विभागाचे उपसचिव दिनेश चव्हाण, पशुसंवर्धन विभागाचे सहसचिव नि. भा. मराळे, सहकार विभागाचे उपसचिव विजय भोसले, शिवाजी चव्हाण, कक्ष अधिकारी व्ही. शि. कदम, भाजपा ओबीसी मोर्चा प्रदेश सचिव पिराजी मंजुळे, नितीन वाघमारे, भाजपा भटके विमुक्त सरचिटणीस रविंद्र शिंदे, वडार समाजाचे कार्याध्यक्ष बाळाराम वारकर, रेश्मा जाधव, राजू जाधव, सागर चौघुले, एस. यू. जाधव, प्रभाकर गवारे, कामिनी सकरू, भरत विटकर, दिलीप गुंजाळ, शिवाजी ननवरे आदी मान्यवर उपस्थित होते.