धाराशिव-लातूर-बीड विधानपरिषदेसाठी महायुतीची ताकद वाढली; जिल्हा परिषद सदस्य आनंद पाटील यांची बसवराज पाटील यांना सदिच्छा भेट

धाराशिव-लातूर-बीडच्या विकासासाठी महायुती सज्ज; बसवराज पाटील यांना वाढता जनाधार
धाराशिव : धाराशिव-लातूर-बीड विधानपरिषद मतदारसंघाच्या निवडणुकीच्या पार्श्वभूमीवर महायुतीचे अधिकृत उमेदवार मा. बसवराजजी पाटील यांच्या प्रचाराला वेग आला असून विविध स्तरांतून त्यांना मोठा प्रतिसाद मिळत आहे. याच अनुषंगाने जिल्हा परिषद सदस्य आनंद पाटील यांनी आज बसवराजजी पाटील यांची सदिच्छा भेट घेऊन आगामी निवडणुकीसाठी शुभेच्छा दिल्या.
यावेळी मतदारसंघातील विकासकामे, स्थानिक स्वराज्य संस्थांची भूमिका, ग्रामीण भागातील प्रश्न तसेच सर्वसामान्य जनतेच्या अपेक्षांबाबत सविस्तर चर्चा करण्यात आली. विकासाभिमुख नेतृत्वाला बळ देण्यासाठी महायुतीच्या उमेदवाराच्या पाठीशी ठामपणे उभे राहण्याचा निर्धारही यावेळी व्यक्त करण्यात आला.
बसवराजजी पाटील यांच्या नेतृत्वाखाली धाराशिव, लातूर आणि बीड जिल्ह्यांच्या सर्वांगीण विकासाला अधिक गती मिळेल, असा विश्वास आनंद पाटील यांनी व्यक्त केला. शिक्षण, आरोग्य, पाणीपुरवठा, रस्ते आणि ग्रामीण विकासाच्या विविध योजनांना चालना देण्यासाठी सक्षम नेतृत्वाची गरज असल्याचेही त्यांनी नमूद केले.
दरम्यान, महायुतीच्या उमेदवाराच्या समर्थनार्थ सुरू असलेल्या भेटीगाठींमुळे निवडणुकीचे वातावरण चांगलेच तापले असून कार्यकर्त्यांमध्ये उत्साहाचे वातावरण निर्माण झाले आहे. आगामी निवडणुकीत बसवराज पाटील यांना विजयी करण्यासाठी कार्यकर्त्यांनी तयारी सुरू केली असल्याचे चित्र दिसून येत आहे.