जिल्हा आरोग्य अधिकाऱ्यांची पारगाव प्राथमिक आरोग्य केंद्राला अचानक भेट; आरोग्य सेवांच्या गुणवत्तेवर समाधानपारगाव | प्रतिनिधी

जिल्हा आरोग्य अधिकाऱ्यांची पारगाव प्राथमिक आरोग्य केंद्राला अचानक भेट; आरोग्य सेवांच्या गुणवत्तेवर समाधान
पारगाव | प्रतिनिधी
ग्रामीण भागातील आरोग्य सेवा अधिक सक्षम, प्रभावी आणि लोकाभिमुख करण्याच्या दृष्टीने जिल्हा आरोग्य अधिकारी डॉ. हरीदास यांनी पारगाव येथील प्राथमिक आरोग्य केंद्राची अचानक पाहणी करून आरोग्य व्यवस्थेचा सखोल आढावा घेतला. या भेटीदरम्यान रुग्णांना दिल्या जाणाऱ्या विविध वैद्यकीय सुविधा, औषधसाठा, स्वच्छता, कर्मचारी उपस्थिती तसेच दैनंदिन कामकाजाची तपासणी करण्यात आली.
पाहणीदरम्यान डॉ. हरीदास यांनी आरोग्य केंद्रातील कामकाजाबाबत समाधान व्यक्त करत आरोग्य सेवांमध्ये आणखी सुधारणा करण्यासाठी आवश्यक मार्गदर्शक सूचना दिल्या. सर्वसामान्य नागरिकांना दर्जेदार व वेळेवर आरोग्य सुविधा उपलब्ध व्हाव्यात, यासाठी आरोग्य कर्मचाऱ्यांनी अधिक संवेदनशीलतेने व जबाबदारीने कार्य करावे, असे आवाहनही त्यांनी केले.
यावेळी त्यांनी आरोग्य कर्मचारी व अधिकाऱ्यांशी संवाद साधून त्यांच्या अडचणी आणि गरजा जाणून घेतल्या. तसेच शासनाच्या विविध आरोग्य योजनांची प्रभावी अंमलबजावणी करण्याबाबत मार्गदर्शन करून कर्मचाऱ्यांचे मनोबल वाढविले.
या भेटीवेळी शिवसेना उपतालुका प्रमुख तथा कृषी उत्पन्न बाजार समिती, वाशीचे संचालक विकास तळेकर, तालुका आरोग्य अधिकारी डॉ. महिंद्रकर, पारगाव प्राथमिक आरोग्य केंद्राचे वैद्यकीय अधिकारी डॉ. कुलकर्णी यांच्यासह आरोग्य विभागातील कर्मचारी मोठ्या संख्येने उपस्थित होते.
जिल्हा पातळीवरील वरिष्ठ अधिकाऱ्यांच्या या पाहणीमुळे पारगाव प्राथमिक आरोग्य केंद्राच्या कार्यक्षमतेत आणखी वाढ होण्यास मदत होणार असून ग्रामीण नागरिकांना अधिक दर्जेदार आणि विश्वासार्ह आरोग्य सेवा उपलब्ध होतील, असा विश्वास यावेळी व्यक्त करण्यात आला.
◆ आरोग्य सेवांच्या उन्नतीसाठी जिल्हा प्रशासनाचा सकारात्मक पुढाकार
◆ ग्रामीण भागातील वैद्यकीय सुविधांना मिळणार नवे बळ