लोहरा परिसरात जुगार अड्ड्यांवर पोलिसांचा धडक प्रहार१२ संशयित ताब्यात; ९.३८ लाखांचा मुद्देमाल जप्त, अवैध धंदेवाल्यांमध्ये खळबळ

लोहरा परिसरात जुगार अड्ड्यांवर पोलिसांचा धडक प्रहार
१२ संशयित ताब्यात; ९.३८ लाखांचा मुद्देमाल जप्त, अवैध धंदेवाल्यांमध्ये खळबळ
 छायाचित्र : जप्त करण्यात आलेल्या दुचाकी, चारचाकी वाहने, जुगार साहित्य आणि कारवाई करणारे पोलीस अधिकारी व कर्मचारी.
धाराशिव जिल्ह्यात अवैध व्यवसायांविरोधात सुरू असलेल्या विशेष मोहिमेअंतर्गत लोहरा परिसरातील जुगार अड्ड्यांवर पोलिसांनी मोठी छापेमार कारवाई करत १२ संशयितांना ताब्यात घेतले असून ९ लाख ३८ हजार ९४० रुपयांचा मुद्देमाल जप्त केला आहे.
मा. पोलीस अधीक्षक श्रीमती रितू खोकर व मा. अपर पोलीस अधीक्षक श्री. सचिन पांडकर यांच्या मार्गदर्शनाखाली परी. पोलीस उपअधीक्षक श्री. अमोल मोहिते यांच्या नेतृत्वाखाली ही कारवाई पार पडली.
परी. पोलीस उपअधीक्षक श्री. अमोल मोहिते यांना प्राप्त झालेल्या खात्रीशीर गोपनीय माहितीच्या आधारे लोहरा येथील कानेगाव रोड तसेच माकणी चौक परिसरातील शंभूराजे हॉटेल येथे सुरू असलेल्या तीन पत्ती (तिरट) जुगार अड्ड्यांवर एकाच वेळी छापेमारी करण्यात आली.
या कारवाईत सहाय्यक पोलीस निरीक्षक श्री. प्रवीण सोमवंशी, श्री. सुरेश कासळे, पोलीस उपनिरीक्षक श्री. रामचंद्र बहुरे तसेच QRT पथकातील अंमलदार व चालक यांनी सक्रिय सहभाग घेतला.
कारवाईदरम्यान १३ संशयित निष्पन्न झाले असून त्यापैकी १२ जणांना ताब्यात घेण्यात आले आहे, तर १ संशयित फरार आहे. संशयितांविरुद्ध महाराष्ट्र जुगार प्रतिबंधक अधिनियम, १८८७ अन्वये लोहरा पोलीस ठाण्यात गुन्हे दाखल करण्यात आले आहेत.
संशयितांकडून जुगाराचे साहित्य, मोबाईल फोन, एक चारचाकी वाहन, सहा दुचाकी वाहने व इतर साहित्य असा एकूण ₹९,३८,९४० किंमतीचा मुद्देमाल जप्त करण्यात आला आहे.
धाराशिव जिल्ह्यात अवैध जुगार, मटका, हातभट्टी दारू, अवैध मद्यविक्री, अमली पदार्थांची तस्करी व विक्री तसेच इतर बेकायदेशीर व्यवसायांविरोधात पोलीस प्रशासनाच्या प्रभावी कारवाया यापुढेही अधिक तीव्रतेने सुरू राहणार असल्याचे स्पष्ट करण्यात आले आहे.
— दैनिक त्रिशक्ती