प्रतिनिधी : सचिन कदम

धाराशिव जिल्ह्यातील नळदुर्ग परिसरात मोठ्या चोरीची घटना उघडकीस आली असून, लोहरा येथील व्यावसायिकाच्या दुकानातून तब्बल ८ लाख ११ हजार ७२० रुपयांचा माल चोरट्यांनी लंपास केल्याची धक्कादायक बाब समोर आली आहे. या प्रकरणी नळदुर्ग पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.

पोलीस सूत्रांकडून मिळालेल्या माहितीनुसार, फिर्यादी अभंग तुळशीराम घोटकर (वय ४८ वर्षे, रा. शिवाजी चौक, लोहरा, ता. लोहरा, जि. धाराशिव) यांचे जळकोट येथे न्यू लक्ष्मी भांडी स्टोअर्स अँड फर्निचर हे दुकान आहे. दिनांक १७ जून २०२६ रोजी रात्री ९.०० वाजल्यापासून ते १८ जून २०२६ रोजी सकाळी ९.३० वाजेपर्यंत अज्ञात चोरट्याने दुकानाच्या पाठीमागील पत्रा काढून आत प्रवेश केला.

यानंतर दुकानातील विविध प्रकारचा माल चोरी करून नेण्यात आला. यात एलईडी टीव्ही ९ नग, तांबा हंडा ८ नग, तांबा हंडा ७ नग, तांबा घागर १५ नग, पितळी देव मिक्स २७० नग, मिक्सर (बाजाज कंपनीचे) २० नग, तांबा टाकी ५ नग, तांबा ॲपल हंडा १३ नग, तांबा कळशी १५ नग, पितळी टोपले ४० नग तसेच पितळी वाटी ६६ नग अशा विविध वस्तूंचा समावेश आहे.

या चोरीतील मालाची एकूण किंमत ८,११,७२० रुपये इतकी असल्याचे फिर्यादीने दिलेल्या तक्रारीत नमूद केले आहे. घटनेमुळे व्यापारी वर्गात चिंतेचे वातावरण निर्माण झाले असून परिसरातील सुरक्षेचा प्रश्न पुन्हा ऐरणीवर आला आहे.

याप्रकरणी फिर्यादी अभंग घोटकर यांनी दिलेल्या प्रथम खबरवरून नळदुर्ग पोलीस ठाण्यात भारतीय न्याय संहिता (BNS) कलम ३३१(४) व ३०५(अ) अन्वये अज्ञात चोरट्याविरुद्ध गुन्हा नोंद करण्यात आला असून, पोलीस पुढील तपास करीत आहेत.