प्रतिनिधी : मोयोदिन बागवान

उमरगा शहरात सुरू असलेल्या जुगार व्यवसायाविरोधात उमरगा पोलिसांनी धडक कारवाई करत दोन वेगवेगळ्या ठिकाणी छापे टाकून जुगार साहित्य व रोख रक्कम जप्त केली. या प्रकरणी दोन जणांविरुद्ध स्वतंत्र गुन्हे दाखल करण्यात आले असून, पोलिसांच्या या कारवाईमुळे बेकायदेशीर जुगार व्यवसाय करणाऱ्यांमध्ये खळबळ उडाली आहे.

पोलीस सूत्रांकडून मिळालेल्या माहितीनुसार, दिनांक १९ जून २०२६ रोजी दुपारी २.३४ ते सायंकाळी ५.२० वाजेदरम्यान उमरगा पोलीस ठाण्याच्या हद्दीत जुगारविरोधी विशेष मोहीम राबविण्यात आली. या मोहिमेदरम्यान दोन ठिकाणी छापे टाकण्यात आले.

पहिल्या कारवाईत आरोपी भिमाशंकर मोतीराम कवटे (वय ३६ वर्षे, रा. पंतणे रोड, उमरगा, ता. उमरगा, जि. धाराशिव) यास दुपारी २.३४ वाजण्याच्या सुमारास उमरगा येथील पंतणे रोडवरील हॉटेल बालाजीच्या बाजूला असलेल्या मोकळ्या जागेत कल्याण मटका जुगार चालविताना पकडण्यात आले. त्याच्याकडून जुगाराचे साहित्य तसेच ५२० रुपयांची रोख रक्कम जप्त करण्यात आली.

त्यानंतर सायंकाळी ५.२० वाजता करण्यात आलेल्या दुसऱ्या कारवाईत आरोपी बालाजी कमलाकर वाघमारे (वय ३५ वर्षे, रा. तुरोरी, ता. उमरगा, जि. धाराशिव) यास उमरगा येथील हॉटेल प्रभातच्या पाठीमागील मोकळ्या जागेत कल्याण मटका जुगार चालविताना पोलिसांनी रंगेहात पकडले. यावेळी त्याच्याकडून जुगाराचे साहित्य व ८२० रुपयांची रोख रक्कम जप्त करण्यात आली.

या दोन्ही कारवायांमध्ये पोलिसांनी जुगारासाठी वापरण्यात येणारे साहित्य आणि रोख रक्कम ताब्यात घेतली असून, संबंधित आरोपींविरुद्ध महाराष्ट्र जुगार प्रतिबंधक कायदा कलम १२(अ) अन्वये उमरगा पोलीस ठाण्यात स्वतंत्र दोन गुन्हे नोंद करण्यात आले आहेत.

उमरगा पोलीस ठाण्याच्या पथकाने केलेल्या या कारवाईमुळे शहरातील बेकायदेशीर जुगार व्यवसायावर आळा बसण्यास मदत होणार असल्याचे बोलले जात असून, पुढील तपास उमरगा पोलीस करीत आहेत.