गाव तिथे शाखा, घर तिथे शिवसैनिक’; तानाजीराव सावंतांचा पदाधिकारी व कार्यकर्त्यांना विजय मंत्रभूम | प्रतिनिधी

‘गाव तिथे शाखा, घर तिथे शिवसैनिक’; तानाजीराव सावंतांचा पदाधिकारी व कार्यकर्त्यांना विजय मंत्र
भूम | प्रतिनिधी
भूम-परंडा-वाशी विधानसभा मतदारसंघाचे आमदार तथा माजी आरोग्यमंत्री प्रा. डॉ. तानाजीराव सावंत यांच्या नेतृत्वाखाली मतदारसंघातील शिवसेना, युवासेना आणि महिला आघाडीच्या प्रमुख पदाधिकाऱ्यांची महत्त्वपूर्ण आढावा बैठक उत्साहात पार पडली. नुकत्याच झालेल्या जिल्हा परिषद व पंचायत समिती निवडणुकांमध्ये मिळालेल्या यशानंतर विकासकामांना गती देत संघटन बांधणी अधिक मजबूत करण्याचे निर्देश त्यांनी यावेळी दिले.
बैठकीत नवनिर्वाचित जिल्हा परिषद व पंचायत समिती सदस्यांचे अभिनंदन करताना डॉ. सावंत यांनी लोकप्रतिनिधींना स्पष्ट शब्दांत सांगितले की, सत्तेचा वापर तळागाळातील सामान्य जनतेचे प्रश्न सोडवण्यासाठीच झाला पाहिजे. जनतेने दाखवलेला विश्वास टिकवणे ही सर्वांची सामूहिक जबाबदारी असल्याचे त्यांनी नमूद केले.
यावेळी मार्गदर्शन करताना ते म्हणाले की, ग्रामीण भागातील नागरिकांच्या समस्या प्राधान्याने सोडवून प्रत्येक सर्वसामान्य माणसाला न्याय मिळेल, अशी भूमिका पदाधिकाऱ्यांनी घ्यावी. संघटनात्मक काम करताना आपसातील मतभेद बाजूला ठेवून एकदिलाने काम करण्याचे आवाहनही त्यांनी केले.
अंतर्गत हेवेदावे, गटबाजी आणि वैयक्तिक मतभेद टाळून केवळ जनसेवा हेच ध्येय समोर ठेवले, तर येणाऱ्या काळात शिवसेनेची ताकद आणखी वाढेल, असा विश्वास त्यांनी व्यक्त केला.
आगामी निवडणुका व संघटन विस्तार लक्षात घेऊन “गाव तिथे शाखा, घर तिथे शिवसैनिक” ही मोहीम प्रभावीपणे राबवण्याचे आदेश त्यांनी दिले. भूम, परंडा आणि वाशी तालुक्यातील प्रत्येक गावात शिवसेनेचा भगवा अधिक बळकट करण्यासाठी पदाधिकाऱ्यांनी आक्रमकपणे मैदानात उतरावे, अशा सूचनाही त्यांनी केल्या.
ही मोहीम केवळ नावापुरती न राहता, तिच्या माध्यमातून सर्वसामान्य नागरिकांना पक्षाशी जोडण्याचे उद्दिष्ट असल्याचे त्यांनी स्पष्ट केले.
या बैठकीस शिवसेना, युवासेना, महिला आघाडीचे प्रमुख पदाधिकारी, नवनिर्वाचित लोकप्रतिनिधी आणि कार्यकर्ते मोठ्या संख्येने उपस्थित होते. डॉ. सावंत यांच्या मार्गदर्शनामुळे कार्यकर्त्यांमध्ये नवचैतन्य निर्माण झाले असून, मतदारसंघाच्या विकासासह पक्षविस्ताराचा नवा अध्याय सुरू होणार असल्याचे चित्र दिसत आहे.