माझं गाव आरोग्य संपन्न गाव अभियान २०२६ : परंडा येथे तालुकास्तरीय कार्यशाळा उत्साहात
परंडा (प्रतिनिधी): सार्वजनिक आरोग्य विभागाच्या वतीने राबविण्यात येणाऱ्या “माझं गाव आरोग्य संपन्न गाव अभियान २०२६” अंतर्गत तालुकास्तरीय कार्यशाळा आज पंचायत समिती परंडा सभागृहात उत्साहात पार पडली. या स्तुत्य उपक्रमाचे आयोजन तालुका आरोग्य अधिकारी कार्यालय व पंचायत समिती परंडा यांच्या संयुक्त विद्यमाने करण्यात आले होते.
कार्यशाळेस पंचायत समितीचे सभापती, उपसभापती, सदस्य, ग्रामसेवक, सरपंच, उपसरपंच तसेच आशा वर्कर मोठ्या संख्येने उपस्थित होते. कार्यक्रमात उपस्थितांना मार्गदर्शन करताना शिवसेना तालुकाप्रमुख श्री. आण्णासाहेब जाधव यांनी अभियानाच्या उद्दिष्टांवर सविस्तर प्रकाश टाकला.
यावेळी त्यांनी माजी आरोग्यमंत्री तथा आमदार प्रा. डॉ. तानाजीराव सावंत यांच्या कार्यकाळात आरोग्य क्षेत्रात राबविण्यात आलेल्या विविध महत्त्वपूर्ण निर्णयांची माहिती उपस्थितांना दिली. गावपातळीवर आरोग्य सुविधा अधिक सक्षम करण्यासाठी हे अभियान प्रभावी ठरणार असल्याचा विश्वास त्यांनी व्यक्त केला.
तसेच, अभियान राबविताना गावोगावी उद्भवणाऱ्या अडचणी दूर करण्यासाठी पंचायत समितीच्या माध्यमातून तसेच आमदार सावंत यांच्या सहकार्याने आणि शिवसेना पदाधिकाऱ्यांच्या मदतीने सर्वतोपरी प्रयत्न करण्यात येतील, अशी ग्वाहीही त्यांनी दिली.
या कार्यशाळेमुळे तालुक्यात आरोग्यविषयक जनजागृतीला चालना मिळणार असून “आरोग्यदायी गाव, समृद्ध गाव” या संकल्पनेला बळकटी मिळणार आहे.
Total views : 12306