अनैतिक देहव्यापारावर धाराशिव पोलिसांची धडक कारवाई’ऑरा’ स्पा सेंटरवर छापा; पाच महिलांची सुटका, व्यवस्थापकासह संबंधितांविरुद्ध गुन्हा दाखल

अनैतिक देहव्यापारावर धाराशिव पोलिसांची धडक कारवाई
‘ऑरा’ स्पा सेंटरवर छापा; पाच महिलांची सुटका, व्यवस्थापकासह संबंधितांविरुद्ध गुन्हा दाखल
धाराशिव | प्रतिनिधी
धाराशिव शहरातील अनैतिक देहव्यापाराच्या अड्ड्यांवर पोलिसांनी मोठी कारवाई करत शहरातील ऑरा (Aura) स्पा सेंटरवर धडक छापा टाकला. या कारवाईत पाच महिलांची सुटका करण्यात आली असून स्पा सेंटरचा व्यवस्थापक, चालक व इतर संबंधितांविरुद्ध अनैतिक मानवी वाहतूक (प्रतिबंध) अधिनियम, 1956 (PITA) अंतर्गत गुन्हा दाखल करण्यात आला आहे.
मा. पोलिस अधीक्षक रितू खोखर व अपर पोलिस अधीक्षक सचिन पांडकर यांच्या मार्गदर्शनाखाली, परिविक्षाधीन पोलिस उपअधीक्षक अमोल मोहिते यांना मिळालेल्या गोपनीय माहितीच्या आधारे ही कारवाई करण्यात आली. पोलिसांच्या विशेष पथकाने बनावट ग्राहक पाठवून माहितीची खात्री केल्यानंतर स्पा सेंटरवर छापा टाकत संपूर्ण कारवाई यशस्वी केली.
तपासादरम्यान संबंधित स्पा सेंटरमध्ये व्यावसायिक लैंगिक शोषण व अनैतिक व्यापार सुरू असल्याचे उघड झाले. कारवाईत पाच महिलांची सुटका (Rescue) करण्यात आली असून त्यांना पुढील कायदेशीर प्रक्रियेसाठी संबंधित प्राधिकरणाकडे पाठविण्यात आले आहे.
अवैध धंद्यांविरोधात पोलिसांचा आक्रमक पवित्रा
धाराशिव जिल्ह्यातील अवैध व्यवसायांचे संपूर्ण उच्चाटन करण्यासाठी पोलिस प्रशासनाने विशेष मोहीम सुरू केली आहे. या मोहिमेची जबाबदारी पोलिस उपअधीक्षक अमोल मोहिते यांच्याकडे सोपविण्यात आली असून बेकायदेशीर व अनैतिक कृत्यांविरोधात कठोर कारवाईचे आदेश देण्यात आले आहेत.
‘गय केली जाणार नाही’ – पोलिसांचा इशारा
अवैध व्यवसायांमध्ये सहभागी असलेल्या कोणत्याही घटकाची गय केली जाणार नाही. अशा प्रकारच्या कारवाया यापुढेही अधिक तीव्रतेने सुरू राहतील, असा सज्जड इशारा पोलिस अधीक्षकांनी दिला आहे.