अवैध विदेशी दारू वाहतुकीवर स्थानिक गुन्हे शाखेची धडक कारवाई

६ लाख ३४ हजार रुपयांचा मुद्देमाल जप्त; दोन आरोपींवर गुन्हा दाखल

धाराशिव, प्रतिनिधी : जिल्ह्यात सुरू असलेल्या अवैध धंद्यांविरोधातील मोहिमेत स्थानिक गुन्हे शाखेने आणखी एक मोठी कारवाई करत अवैध विदेशी दारूची वाहतूक करणाऱ्या इनोव्हा कारसह तब्बल ६ लाख ३४ हजार ६०० रुपयांचा मुद्देमाल जप्त केला आहे. या प्रकरणी दोन आरोपींविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे.

पोलीसांकडून मिळालेल्या माहितीनुसार, दि. २१ मे २०२६ रोजी स्थानिक गुन्हे शाखेचे पथक जिल्ह्यातील मालमत्तेविषयक गुन्ह्यांचा तपास, फरारी आरोपींचा शोध तसेच अवैध धंद्यांवर कारवाई करण्यासाठी गस्त घालत होते. यावेळी येडशी येथील छत्रपती शिवाजी महाराज चौक परिसरात असताना पथकाला गुप्त बातमीदारामार्फत माहिती मिळाली की, इनोव्हा कार (क्र. एमएच १५ बीएक्स ६८२०) मधून अवैध विदेशी दारूची चोरटी वाहतूक केली जात आहे.

माहितीची खातरजमा करून पोलिसांनी तातडीने सापळा रचला व संशयित वाहन अडवले. वाहन चालकाने आपले नाव सुभाष भिमराव उर्फ लाला काळे (वय ३३, रा. कन्हेरवाडी, ता. कळंब) असे सांगितले. तर वाहनातील दुसऱ्या व्यक्तीने आपली ओळख दादा रामा काळे (वय ४६, रा. जुना बस डेपो परिसर, पारधी पिढी, धाराशिव) अशी दिली.

वाहनाची झडती घेतली असता त्यामध्ये विदेशी दारूच्या बाटल्यांनी भरलेले बॉक्स आढळून आले. त्यानंतर पोलिसांनी इनोव्हा कार आणि विदेशी दारू असा एकूण ६ लाख ३४ हजार ६०० रुपयांचा मुद्देमाल जप्त केला.

या प्रकरणी दोन्ही आरोपींविरुद्ध महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला असून पुढील तपास सुरू आहे.

दरम्यान, जिल्ह्यात अवैध धंद्यांविरोधात सुरू असलेल्या कारवायांमुळे संबंधितांमध्ये खळबळ उडाली असून कायदा व सुव्यवस्था अबाधित ठेवण्यासाठी अशा कारवाया पुढेही सुरू राहणार असल्याचे पोलिसांकडून सांगण्यात आले.

मार्गदर्शनाखाली यशस्वी कारवाई

ही कारवाई पोलीस अधीक्षक यांच्या मार्गदर्शनाखाली स्थानिक गुन्हे शाखेचे पोलीस निरीक्षक , सपोनि अमोल मोरे, पोहेकॉ बळीराम शिंदे, अमोल चव्हाण व चालक पोकाॅ दहीहांडे यांच्या पथकाने पार पाडली.