नवलगावमध्ये गावभेट दौरा; नागरिकांच्या समस्या जाणून घेत विकासाचा आराखडा

नवलगावमध्ये गावभेट दौरा; नागरिकांच्या समस्या जाणून घेत विकासाचा आराखडा

नवलगाव, प्रतिनिधी :
भूम-परंडा-वाशी मतदारसंघाचे आमदार तथा माजी आरोग्यमंत्री डॉ. तानाजीराव सावंत यांच्या मार्गदर्शनाखाली नवलगाव येथे गावभेट दौऱ्याचे आयोजन करण्यात आले. या दौऱ्यात गावातील विविध विकासकामे, मूलभूत सुविधा आणि नागरिकांच्या प्रलंबित प्रश्नांचा आढावा घेत ग्रामस्थांशी थेट संवाद साधण्यात आला.

गावातील पाणीपुरवठा, रस्ते, वीज, शेतीसंदर्भातील अडचणी तसेच इतर नागरी सुविधांबाबत ग्रामस्थांनी आपल्या समस्या मांडल्या. या सर्व प्रश्नांचा शासन स्तरावर पाठपुरावा करून त्यांचे निराकरण करण्यासाठी प्रयत्न केले जातील, अशी ग्वाही उपस्थित पदाधिकाऱ्यांनी दिली.

यावेळी कृषी उत्पन्न बाजार समितीचे संचालक विशाल बापू ढगे यांनी सांगितले की, डॉ. तानाजीराव सावंत यांच्या आदेशानुसार मतदारसंघातील प्रत्येक गावात जाऊन नागरिकांच्या समस्या जाणून घेण्याचे आणि त्या शासनापर्यंत पोहोचविण्याचे काम सुरू आहे. विकास हाच केंद्रबिंदू ठेवून जनतेशी थेट संवाद साधण्याचा संकल्प करण्यात आला असून गावागावातील प्रश्न सोडविण्यासाठी सातत्याने प्रयत्न सुरू राहतील, असे त्यांनी नमूद केले.

या गावभेट दौऱ्याला जिल्हा परिषद सदस्य बालाजी काळे, पंचायत समिती सदस्य शंकर सुबुगडे, पंचायत समिती सदस्य संतोष लोखंडे, कृषी उत्पन्न बाजार समितीचे माजी सभापती निलेश शेळवणे, माजी उपसभापती जयसिंग गोपने, सोशल मीडिया प्रमुख भगत पाटील यांची प्रमुख उपस्थिती होती.

तसेच ग्रामपंचायत सदस्य बापू सोनार, शशिकांत ढगे, देवदास रामदास, ऋषी ढगे, दयानंद भगत, अमर भगत, सुखदेव ढेकळे, बाळासाहेब भगत, दत्ता लोंढे, श्रीरंग लोंढे, नवनाथ ढेकळे यांच्यासह मोठ्या संख्येने ग्रामस्थ उपस्थित होते.

ग्रामस्थांच्या समस्या प्रत्यक्ष जाणून घेऊन त्यावर उपाययोजना करण्यासाठी आयोजित करण्यात आलेल्या या गावभेट दौऱ्यामुळे नागरिकांनी समाधान व्यक्त केले असून विकासकामांना अधिक गती मिळण्याची अपेक्षा व्यक्त केली जात आहे.