धाराशिवमध्ये आता लोकशाहीर अण्णाभाऊंचे भव्य स्मारक!

धाराशिवमध्ये आता लोकशाहीर अण्णाभाऊंचे भव्य स्मारक!

विनामूल्य जागा मिळणार, पाठपुराव्याला यश : आमदार राणाजगजितसिंह पाटील यांची माहिती

धाराशिव शहरात लोकशाहीर अण्णाभाऊ साठे यांच्या भव्य स्मारक उभारणीचा मार्ग आता सुकर झाला आहे. आपण केलेल्या सातत्यपूर्ण पाठपुराव्याला यश मिळाले असून शहरात भव्य स्मारक उभारण्यासाठी शासकीय दूध संघाची जागा विनामूल्य देण्याच्या निर्णयावर मंत्रिमंडळाच्या बैठकीत शिक्कामोर्तब करण्यात आले आहे. त्यामुळे नगरपालिकेचे दोन कोटी रुपये वाचणार आहेत. आता लवकरच धाराशिवमध्ये लोकशाहीर अण्णाभाऊ साठे यांचे भव्य आणि ऐतिहासिक स्मारक उभारले जाणार असल्याची माहिती ‘मित्र’ चे उपाध्यक्ष तथा आमदार राणाजगजितसिंह पाटील यांनी यांनी दिली आहे.

धाराशिव शहरात लोकशाहीर अण्णाभाऊ साठे यांचा पूर्णाकृती पुतळा आणि भव्य स्मारक उभारण्यात यावे अशी अनेक वर्षांपासूनची मागणी होती. त्यानुसार या स्मारकाच्या उभारणीसाठी नगरविकास विभागाच्या माध्यमातून यापूर्वीच आपण ₹ १.५० कोटी निधी मंजूर करवून घेतलेला आहे. पालिका निवडणुकीच्या अगोदर शहरात अण्णाभाऊ साठे यांचे भव्य स्मारक उभारण्यात येणार असल्याचे अभिवचनही वचननाम्याच्या माध्यमातून आपण शहरवासीयांना दिले होते. तत्कालीन महसूलमंत्री ना.राधाकृष्ण विखे पाटील यांनी ऑगस्ट महिण्यात जागा हस्तांतरित करण्याचा निर्णय घेतला होता मात्र त्यासाठी नगरपालिकेला शासनाकडे जागेच्या बदल्यात बाजारभावाप्रमाणे  ₹ २ कोटी ८ लाख भरणे आवश्यक होते, पालिकेकडे निधी नसल्याने हा विषय प्रलंबित होता. मात्र शासनाने विशेष बाब म्हणून सदर रक्कम माफ करावी यासाठी आपले प्रयत्न सुरू होते. त्याला आज यश आले असून त्यावर आपल्या महायुती सरकारने विनामूल्य जागा उपलब्ध करून देण्याच्या महत्वपूर्ण निर्णयावर शिक्कामोर्तब केले आहे. त्यामुळे शहरातील हे स्मारक भव्य, दर्जेदार व प्रेरणादायी स्वरूपात साकारले जाणार असल्याचे आमदार राणाजगजितसिंह पाटील यांनी म्हटले आहे.

राज्य मंत्रिमंडळाच्या बैठकीत स्मारकासाठीच्या जागेचा प्रश्न निकाली काढण्यात आला आहे. त्यानुसार धाराशिव नगरपालिकेला सर्व्हे क्रमांक ४२६ येथील स्मारकासाठी आवश्यक असलेली १ एकर जमीन भोगाधिकार विनामूल्य, मूल्यरहित व महसूलमुक्त किंमतीने उपलब्ध करून देण्यास राज्य मंत्रिमंडळाने मान्यता दिली आहे. त्यामुळे अण्णाभाऊ साठे यांच्या भव्य स्मारक उभारणीचा मार्ग आता सुकर झाला आहे. स्मारक उभारणीच्या प्रयत्नांना आता अधिकृत आणि ठोस स्वरूप प्राप्त झाले आहे. जमीन नगरपालिकेच्या ताब्यात आल्यानंतर जिल्हाधिकारी यांच्या अध्यक्षतेखालील समितीमार्फत पुतळा उभारणीसाठी आवश्यक ती सर्व प्रक्रिया राबवून सर्व परवानग्या देण्यात येणार आहेत. उर्वरित प्रशासकीय प्रक्रिया वेगाने आणि वेळेत पूर्ण पार पाडण्यासाठी आपण अखेरपर्यंत पाठपुरावा करणार असल्याचेही आमदार राणाजगजितसिंह पाटील यांनी म्हटले आहे. या महत्वपूर्ण निर्णयाबद्दल राज्याचे मुख्यमंत्री देवेंद्रजी फडणवीस साहेब, उपमुख्यमंत्री एकनाथ शिंदे साहेब, अजितदादा पवार साहेब, महसूल मंत्री चंद्रशेखर बावनकुळे साहेब, तात्कालीन महसूलमंत्री राधाकृष्ण विखे पाटील आणि जिल्ह्याचे पालकमंत्री प्रताप सरनाईक साहेब यांचे आमदार राणाजगजितसिंह पाटील यांनी मनःपूर्वक धन्यवादही मानले आहेत.

चौकट

लोकशाहीर अण्णाभाऊंच्या स्मारकासाठी लोकसहभागाचे आवाहन

धाराशिव शहरात लोकशाहीर अण्णाभाऊ साठे यांचे भव्य स्मारक उभारण्यात येणार असून पूर्णाकृती पुतळ्यासह आकर्षक उद्यान व अभ्यासिकेचाही त्यात समावेश असेल. स्मारकासाठी लोकसहभागातून निधी उभारण्यात येणार आहे. या उपक्रमासाठी आमदार राणाजगजितसिंह पाटील यांनी स्वतः रु. १ लाख जाहीर केले असून, लोकशाहीर अण्णाभाऊ यांच्यावर श्रद्धा असणाऱ्या नागरिकांनी आपआपल्या परीने योगदान द्यावे, असे आवाहनही त्यांनी केले आहे. या स्मारकाच्या माध्यमातून लोकशाहीर अण्णाभाऊ साठे यांच्या विचारांची, साहित्याची व सामाजिक लढ्यांची स्मृती जिवंत ठेवण्यात येणार असून, पुढील पिढीला प्रेरणा मिळेल, असा विश्वासही आमदार राणाजगजितसिंह पाटील यांनी व्यक्त केला आहे.