इस्कॉन धाराशिव तर्फे श्रीमद् भागवत कथेचे आयोजन

इस्कॉन धाराशिव तर्फे श्रीमद् भागवत कथेचे आयोजन

धाराशिव, दि. 23 मे 2026

पवित्र अधिक मासाच्या मंगलमय पर्वानिमित्त आंतरराष्ट्रीय कृष्णभावनामृत संघ अर्थात इस्कॉन, धाराशिव यांच्या वतीने दिव्य आणि आध्यात्मिक उन्नती प्रदान करणाऱ्या ‘श्रीमद् भागवत कथा महोत्सवा’चे भव्य आयोजन करण्यात आले आहे.

हा सात दिवसीय कथा सोहळा दि. 25 मे ते 31 मे 2026 दरम्यान स्वयंवर मंगल कार्यालय, जिजाऊ चौक, धाराशिव येथे संपन्न होणार असून दररोज सायंकाळी 5 ते रात्री 8 या वेळेत कथा श्रवणाचा लाभ भाविकांना घेता येणार आहे. कथेनंतर दररोज भव्य आरती व सर्वांसाठी महाप्रसाद आयोजित करण्यात आला आहे.

या दिव्य कथेचे रसाळ निरूपण वृंदावन धाम येथील परम आदरणीय श्रीमान देवहरी प्रभूजी यांच्या श्रीमुखातून होणार आहे. त्यांच्या अमृतमयी वाणीमधून भगवान श्रीकृष्णांच्या लीलांचे, भक्तीचे आणि सनातन धर्मातील गूढ तत्त्वज्ञानाचे रसपूर्ण वर्णन भाविकांना अनुभवता येणार आहे.

इस्कॉन धाराशिव तर्फे दरवर्षी आयोजित करण्यात येणाऱ्या या कथा महोत्सवाचे हे दहावे वर्ष असून, पंचक्रोशीतील हजारो भाविक भक्त या आध्यात्मिक पर्वाची आतुरतेने प्रतीक्षा करत असतात.

अधिक मासात श्रीमद् भागवत कथा श्रवणाला विशेष पुण्यप्राप्ती मानली जाते. त्यामुळे सर्व श्रद्धाळू भाविकांनी परिवारासह उपस्थित राहून कथा, कीर्तन, आरती आणि महाप्रसादाचा लाभ घ्यावा, असे प्रेमपूर्वक आवाहन इस्कॉन, धाराशिव यांच्या वतीने करण्यात येत आहे.