डॉ बाबासाहेब आंबेडकर जयंतीच्या पार्श्वभूमीवर मोहोळमध्ये बैठकीचे आयोजन .

डॉ बाबासाहेब आंबेडकर जयंतीच्या पार्श्वभूमीवर मोहोळमध्ये बैठकीचे आयोजन .
➡️ डीजे-डॉल्बीला सक्त मनाई, पारंपरिक वाद्यांचा मिरवणूकीत भर द्यावा – बाजीराव पोवार, पोलीस निरीक्षक, मोहोळ.

दैनिक त्रिशक्ती / राजेश शिंदे

मोहोळ :- डॉ बाबासाहेब आंबेडकर जयंती 2026 च्या पार्श्वभूमीवर मोहोळ पोलीस ठाण्यात उत्सव शांततेत व सुव्यवस्थित पार पाडण्यासाठी महत्त्वपूर्ण बैठक पार पडली. सायंकाळी 5.00 ते 6.15 या वेळेत झालेल्या या बैठकीत विविध आंबेडकर जयंती उत्सव मंडळांचे पदाधिकारी मोठ्या संख्येने उपस्थित होते. सुमारे 150 ते 175 जणांचा सहभाग नोंदवण्यात आला.
बैठकीत पोलीस प्रशासनाने उत्सव काळात कायदा व सुव्यवस्था अबाधित राखण्यासाठी स्पष्ट व कडक सूचना दिल्या. मिरवणुकीदरम्यान डीजे, डॉल्बी तसेच उच्च क्षमतेचे ध्वनीवर्धक वापरण्यास सक्त मनाई करण्यात आली असून, मिरवणूक केवळ पारंपरिक वाद्यांच्या माध्यमातूनच काढावी, असे निर्देश देण्यात आले.
तसेच, कोणत्याही परिस्थितीत पारंपरिक मिरवणूक मार्गात बदल न करता त्याच मार्गाचा अवलंब करावा, असे स्पष्ट करण्यात आले. मिरवणुकीदरम्यान कोणताही अनुचित प्रकार घडू नये यासाठी मंडळांनी स्वयंशिस्त पाळावी व पोलीस प्रशासनाशी सतत समन्वय ठेवावा, असेही यावेळी सांगण्यात आले.
ध्वनीप्रदूषण प्रतिबंधक नियमांचे काटेकोर पालन करणे बंधनकारक असल्याचे अधोरेखित करताना, धार्मिक भावना भडकतील किंवा कायदा व सुव्यवस्थेला बाधा निर्माण होईल असे कोणतेही कृत्य टाळण्याचे आवाहन करण्यात आले. तसेच वाहतूक व्यवस्था सुरळीत राहण्यासाठी पोलीस यंत्रणेला सहकार्य करावे आणि कोणतीही आपत्कालीन परिस्थिती उद्भवल्यास तात्काळ पोलीस ठाण्याशी संपर्क साधावा, असेही निर्देश देण्यात आले. विद्युत जोडणी सुरक्षित व व्यवस्थित ठेवण्याबाबतही सूचना देण्यात आल्या.
बैठकीत उपस्थित सर्व मंडळ पदाधिकाऱ्यांना या सूचनांची सविस्तर माहिती देण्यात आली असून त्यांनी त्याचे पालन करण्याचे आश्वासन दिले आहे.
या बैठकीस सभापती अस्लम चौधरी, अव्वल कारकून आचलारे, नगरपरिषद मोहोळच्या कार्यालयीन अधीक्षक प्रियांका गोरे, सह सहाय्यक गटविकास अधिकारी देशमुख सह आदी मान्यवर उपस्थित होते.
पोलीस निरीक्षक बाजीराव पोवार यांच्या मार्गदर्शनाखाली ही बैठक शांततेत व सुरळीत पार पडली.