कळंबमध्ये गुटखा माफियांना पोलिसांचा जबरदस्त दणका; ५ लाख ६९ हजार ८०० रुपयांचा साठा जप्त

कळंबमध्ये गुटखा माफियांना पोलिसांचा जबरदस्त दणका; ५ लाख ६९ हजार ८०० रुपयांचा साठा जप्त
पांडे गल्लीतील गोदामावर धाडसी छापा; पोलिसांच्या कारवाईवर जनतेतून कौतुकाचा वर्षाव
कळंब : शहरात अवैध गुटखा आणि प्रतिबंधित तंबाखूजन्य पदार्थांच्या विक्रीविरोधात कळंब पोलिसांनी मोठी आणि धडाकेबाज कारवाई करत गुटखा माफियांना चांगलाच दणका दिला आहे. गुप्त माहितीच्या आधारे करण्यात आलेल्या या कारवाईत तब्बल ५ लाख ६९ हजार ८०० रुपयांचा प्रतिबंधित गुटखा व तंबाखूजन्य पदार्थांचा साठा जप्त करण्यात आला.
दिनांक २२ जून २०२६ रोजी पोलिस ठाणे कळंबचे पोलिस निरीक्षक शकील शेख यांच्या नेतृत्वाखाली आणि उपविभागीय पोलिस अधिकारी संजय पवार यांच्या मार्गदर्शनाखाली ही कारवाई करण्यात आली. गुप्त बातमीदाराकडून मिळालेल्या माहितीच्या आधारे कळंब शहरातील पांडे गल्ली येथे सोमनाथ क्षीरसागर यांच्या मालकीच्या गोदामावर दुपारी सुमारे २ वाजण्याच्या दरम्यान अचानक छापा टाकण्यात आला.
या छाप्यामध्ये विविध प्रकारचा गुटखा व प्रतिबंधित तंबाखूजन्य पदार्थांचा मोठा साठा आढळून आला. पोलिसांनी तत्काळ पंचनामा करून एकूण ५ लाख ६९ हजार ८०० रुपयांचा मुद्देमाल जप्त केला. या कारवाईमुळे शहरातील अवैध गुटखा विक्रेते व साठेबाजांमध्ये एकच खळबळ उडाली असून पोलिसांच्या या धाडसी मोहिमेचे नागरिकांकडून जोरदार स्वागत होत आहे.
आरोग्यास घातक असलेल्या आणि कायद्याने प्रतिबंधित करण्यात आलेल्या तंबाखूजन्य पदार्थांविरोधात पोलिसांनी घेतलेल्या या कठोर भूमिकेमुळे अवैध धंदे करणाऱ्यांना स्पष्ट इशारा मिळाला आहे. अशाच प्रकारच्या कारवाया सातत्याने सुरू राहाव्यात, अशी अपेक्षा नागरिकांनी व्यक्त केली आहे. दरम्यान, पोलिसांनी केलेल्या या धाडसी कारवाईबद्दल सर्वसामान्य नागरिकांतून कौतुकाचा वर्षाव होत असून, अवैध व्यवसायाविरोधातील ही मोहीम अधिक तीव्र करण्याची मागणी होत आहे.
सदरची कारवाई उपविभागीय पोलिस अधिकारी संजय पवार यांच्या मार्गदर्शनाखाली पोलिस निरीक्षक शकील शेख, सहायक पोलिस निरीक्षक राम घाडगे, पोलिस नाईक भाऊसाहेब पोळ, अर्जुन शेख, इरफान शेख, पोलिस अंमलदार परमेश्वर कदम, अनिल भोसले, अय्याराम खाडे, गोविंद मोटेगावकर तसेच महिला पोलिस अंमलदार क्षीरसागर यांच्या पथकाने यशस्वीरीत्या पार पाडली.