देवदरीच्या हजरत शेख फरीद बाबा दर्ग्यात उमेशराजे निंबाळकर यांची जियारत; दर्गा समितीकडून उत्स्फूर्त सत्कार

देवदरीच्या हजरत शेख फरीद बाबा दर्ग्यात उमेशराजे निंबाळकर यांची जियारत; दर्गा समितीकडून उत्स्फूर्त सत्कार
धाराशिव : तालुक्यातील देवदरी येथील प्रसिद्ध हजरत शेख फरीद बाबा गड दर्ग्यात जियारत निमित्त आयोजित धार्मिक कार्यक्रमात जिल्हा काँग्रेस कमिटीचे अध्यक्ष उमेशराजे निंबाळकर यांनी उपस्थित राहून फुलांची चादर अर्पण करत दर्शन घेतले. यावेळी धार्मिक आणि सामाजिक ऐक्याचे दर्शन घडल्याने परिसरात उत्साहाचे वातावरण निर्माण झाले होते.
जियारत कार्यक्रमात उमेशराजे निंबाळकर यांच्यासमवेत धाराशिव जिल्हा मध्यवर्ती सहकारी बँकेचे संचालक पटेल महेबुब पाशा यांचीही प्रमुख उपस्थिती होती. दर्ग्यातील धार्मिक विधी पार पडल्यानंतर उपस्थित मान्यवरांनी हजरत शेख फरीद बाबा यांच्या दरबारात माथा टेकून सर्वसामान्यांच्या सुख-समृद्धीसाठी प्रार्थना केली.
यावेळी दर्गा कमिटीचे अध्यक्ष शौकत अमीर मुजावर, गौस बाबुमिया मुजावर, दिलदार पटेल, मारुती बरवे यांच्यासह अनेक मान्यवर उपस्थित होते. कार्यक्रमानंतर दर्गा कमिटीच्या वतीने उमेशराजे निंबाळकर यांचा पुष्पहार घालून जाहीर सत्कार करण्यात आला. शौकत अमीर मुजावर यांनी त्यांचे स्वागत करत पुढील राजकीय व सामाजिक वाटचालीसाठी शुभेच्छा दिल्या.
धर्मनिरपेक्षतेचा संदेश देणाऱ्या या कार्यक्रमात विविध समाजघटकांतील नागरिकांनी मोठ्या संख्येने सहभाग नोंदविला. सामाजिक सलोखा, बंधुभाव आणि सर्वधर्म समभावाचे दर्शन घडविणाऱ्या या कार्यक्रमाची परिसरात विशेष चर्चा रंगली असून उपस्थितांनी या उपक्रमाचे कौतुक केले.
देवदरी येथील हजरत शेख फरीद बाबा दर्ग्यात पार पडलेल्या या जियारत कार्यक्रमामुळे धार्मिक श्रद्धा आणि सामाजिक एकात्मतेचा संदेश अधिक दृढ झाल्याची भावना उपस्थित नागरिकांनी व्यक्त केली.