परांडा येथे नवीन न्यायालयीन इमारतीसाठी १५० कोटींच्या प्रकल्पास मंजुरी; ५४.०२ कोटींचा निधी मंजूरभूम-परांडा-वाशी प्रतिनिधी

परांडा येथे नवीन न्यायालयीन इमारतीसाठी १५० कोटींच्या प्रकल्पास मंजुरी; ५४.०२ कोटींचा निधी मंजूर
भूम-परांडा-वाशी प्रतिनिधी
भूम-परांडा-वाशी मतदारसंघासाठी आजचा दिवस विकासाच्या दृष्टीने महत्त्वपूर्ण ठरला असून परांडा येथे नवीन न्यायालयीन इमारतीच्या उभारणीसाठी शासनाने तब्बल १५० कोटी रुपयांच्या एकूण प्रकल्पास मंजुरी दिली आहे. यापैकी पहिल्या टप्प्यात ५४ कोटी २ लाख रुपयांचा भरीव निधी मंजूर करण्यात आला असून यासंदर्भातील शासन निर्णय आज प्रकाशित झाला आहे.
गेल्या अनेक वर्षांपासून प्रलंबित असलेल्या या प्रश्नाला अखेर मार्ग मिळाल्याने तालुक्यातील पक्षकार, वकील आणि नागरिकांमध्ये समाधान व्यक्त होत आहे. प्रस्तावित न्यायालयीन इमारत अत्याधुनिक सोयी-सुविधांनी सुसज्ज असणार असून त्यामुळे न्यायदान प्रक्रिया अधिक गतिमान व सुलभ होण्यास मदत होणार आहे. ग्रामीण भागातील नागरिकांना याचा मोठा दिलासा मिळणार असल्याचे मानले जात आहे.
या निर्णयाबाबत मतदारसंघाचे माननीय आमदार प्रा. डॉ. तानाजीराव सावंत यांनी समाधान व्यक्त करत जनतेच्या विश्वासामुळेच हे काम शक्य झाल्याचे सांगितले. मतदारसंघातील प्रशासकीय सुविधांचा बॅकलॉग दूर करून सर्वांगीण विकास साधण्याचा आपला प्रयत्न कायम राहील, असेही त्यांनी नमूद केले.
तसेच या महत्त्वपूर्ण निर्णयासाठी राज्याचे माननीय मुख्यमंत्री देवेंद्र फडणवीस, माननीय उपमुख्यमंत्री एकनाथ शिंदे तसेच महाराष्ट्र शासनाचे त्यांनी मनःपूर्वक आभार मानले.
मतदारसंघात विकासकामांची गती अशीच कायम ठेवत प्रत्येक गावापर्यंत सुविधा पोहोचवण्याचा निर्धार व्यक्त करत, जनतेच्या सेवेसाठी सदैव कटिबद्ध राहण्याची ग्वाही आमदार सावंत यांनी दिली.